बुटवल,मंसिर २४ ।

रूरू धार्मिक तथा पर्यटकीय क्षेत्र रिडी धाममा रिडी खोला तथा कालीगण्डकी नदी नियन्त्रण आयोजनाको शिलान्यास भएकाे छ ।

साे अवसरमा बाेल्दै लुम्बिनी प्रदेशका मुख्यमन्त्री शंकर पोखरेलले प्रदेश सरकार प्रदेशका नागरिकहरुलाई समृद्ध बनाउन अग्रसर भएको बताए ।

उनले प्रदेश सरकारले विभिन्न योजनाहरु बनाएको बताउँदै व्यवसायिक रुपमा उद्यम गर्नेहरुका लागि बैंकको ब्याजमा अनुदान दिने योजना ल्याएको सुनाए ।

त्यसका लागि दीर्घकालिन रुपमा व्यवसाय गर्नुपर्नेमा जोड दिएका छन् । नेकपा सरकारले गरेका राम्रा कामहरुलाई उल्लेख पनि गर्न नचाहने केही शक्तिहरु लागेको भन्दै तथ्यमा आधारित भएर बोल्न समेत उनले आग्रह गरेका छन् ।

लुम्बिनी प्रदेशका उद्योग ,पर्यटन वन तथा वातावरणमन्त्री लीला गिरीले पर्यटन क्षेत्रको विकासका लागि प्रदेश सरकार साथमै रहेको बताए ।

रूरू क्षेत्रको बृहत गुरुयोजना तयार भएर पहिलो चरणको काम अन्तर्गत अहिले तटबन्ध गर्न लागिएको उनले बताए । यसपछि पुनः अन्य कामहरु क्रमश हुँदै जाने र रुरु क्षेत्रलाई धार्मिक पर्यटकीय क्षेत्रका रुपमा विकास गरिने उनले बताए ।

केन्द्र सरकार र प्रदेश सरकारको समपुरक कोशमार्फत आर्थिक बर्ष २०७६-७७ मा बोलपत्र गरी ३४ करोड २० लाख ६० हजार ६३९ रुपैयाँ भू तथा जलाधार ब्यबस्थापन कार्यालय पाल्पा र सगुन शर्मा जेभी बुटवल बिच सम्झौता भएर काम अघि बढेको छ । २०७७ जेठ ११ गते सम्झौता भई २०७९ साल मङसिर १० गते भित्रै कार्य सम्पन्न गर्नुपर्नेछ । 

नदी क्षेत्रमा कुल २ हजार ८२० मिटर लम्बाई , सात मिटर उचाई रहेको आरसिसी टेवा पर्खाल निर्माण गरिने छ भने ऋषिकेश मन्दिर क्षेत्रमा २८८ मिटरको सिँढी (प्याराफिट ) निर्माण गरिनेछ । कार्यक्रममा पाल्पा र गुल्मी क्षेत्रका जनप्रतिनिधि , राजनीतिक दलका प्रमुख तथा प्रतिनिधिहरुको सहभागिता रहेको थियो ।

कार्यक्रममा संघीय सांसद सोमप्रसाद पाण्डेय, लुम्बिनी प्रदेश सांसद कमल श्रेष्ठ, डा. पुरनमान बज्रचार्य, तानसेन नगरप्रमुख अशोककुमार शाही, रूरू क्षेत्र गाउँपालिका अध्यक्ष निलकण्ठ गौतम, लुम्बिनी प्रदेश उद्योग, पर्यटन, वन तथा वातावरण मन्त्रालयका सचिव डा. राजेन्द्र केसी लगायतले रुरु क्षेत्रलाई प्रमुख धामका रुपमा विकास गदै अघि बढ्न प्रदेश सरकारको सहयोग महत्वपूर्ण रहेको बताएका थिए । 

नागरिक अनलाइन

लेखकबाट थप

• बुधवार, मंसिर २४ २०७७१०:०१:३४

• Tags:

  # रूरू # रूरू क्षेत्र # रिडी

• रक्तसञ्चार सेवाको ईतिहास झण्डै ४ सय बर्ष पुरानो

• दुई हजार ६८८ मिटर लामो नागढुङ्गा-सिस्नेखोला सुरुङमार्गको उद्घाटन

• ‘द बम्बई लाउञ्ज’को प्रथम वार्षिकोत्सव साउन १४ र १५ गते हुदै,छुटसहित सांगीतिक कार्यक्रम गरिने

• इन्जिनियरहरू पूर्वाधार निर्माणका मात्र होइन, समाज रूपान्तरणका महत्वपूर्ण साझेदार

• आजदेखि कार्तिक शुक्ल एकादशीका दिनसम्म तुलसीको विशेष पूजा