बुटवल,कार्तिक १५ ।

फर्निचर व्यवसायलाई नयाँ पुस्तामा हस्तान्तरण गर्दै आधुनिक प्रविधिसँग जोड्न सके विदेशबाट आयात हुने उत्पादनसमेत स्वदेशमै बनाउन सकिने सरोकारवालाले बताएका छन्।

रुपन्देहीका फर्निचर उद्योगीले व्यवसायको संरक्षण, दक्ष जनशक्ति उत्पादन, दर्ताबिनाका व्यवसायको नियन्त्रण र उद्योगीका लागि छुट्टै औद्योगिक क्षेत्र निर्माण गर्नुपर्नेमा जोड दिएका छन्।

फर्निचर उद्योग संघ रुपन्देहीको २७औं साधारणसभामा बोल्ने वक्ताहरूले फर्निचर व्यवसायमा देखिएका समस्या समाधानका लागि स्थानीय सरकार र सरोकारवाला संस्थाबीच सहकार्य आवश्यक रहेको बताए।

कार्यक्रमका प्रमुख अतिथि बुटवल उपमहानगरपालिकाका नगरप्रमुख खेलराज पाण्डेयले व्यवसायीका समस्या समाधानका लागि मन्तव्य र आश्वासनले मात्रै नपुग्ने बताए। एकीकृत व्यावसायिक सिटी निर्माण नगरेसम्म व्यवसायीका पीडा सधैँ कथाका रूपमा मात्रै दोहोरिरहने उनको भनाइ थियो।

‘व्यवसायीले दुःख पाइराख्ने, हामी आएर मन्तव्य व्यक्त गर्ने, शुभकामना दिने र फर्किनेले मात्रै अर्थ राख्दैन,’ उनले भने।

पाण्डेयले बुटवलमा नयाँ अटो भिलेज, ग्रीन सिटी, फर्निचर सिटी र कबाड सिटी निर्माण गर्नुपर्ने प्रस्ताव अघि सारे। यी चारवटै क्षेत्र व्यवस्थित रूपमा निर्माण गर्न करिब १०० बिघा जग्गा आवश्यक पर्ने भए पनि बुटवलमा जग्गाको अभाव रहेको उनले बताए। त्यसका लागि छिमेकी पालिकासँग समन्वय गरेर जग्गा खोज्नुपर्ने उनको भनाइ थियो।

उनले अटो भिलेजमा विद्युतीय सवारीसाधनसहित सबै प्रकारका गाडी मर्मत गर्ने आधुनिक सुविधा हुनुपर्ने बताए। त्यस्तै, फर्निचर, ग्रिल तथा पुनःप्रयोग गर्न मिल्ने वस्तुको कारोबार गर्ने व्यवसायलाई निश्चित क्षेत्रमा व्यवस्थापन गर्न सके स्थानीयको गुनासो र व्यवसायीको समस्या दुवै समाधान हुने उनको धारणा थियो।

नगरप्रमुख पाण्डेयले दर्ताबिनाका व्यवसायमाथि अनुगमन कडा बनाउने प्रतिबद्धता जनाउँदै आवश्यक टोली निर्माणमा उपमहानगरपालिकाले सहयोग गर्ने बताए। अनुगमनका लागि नगर प्रहरी परिचालन गर्नुपर्ने भए त्यसको खर्चसमेत उपमहानगरपालिकाले व्यहोर्ने उनको भनाइ थियो। व्यवसायीलाई तालिम तथा व्यवसाय विस्तारका ठोस योजना ल्याउन आग्रह गर्दै उनले एकीकृत व्यावसायिक सिटी निर्माणका लागि पहल गर्ने बताए।

बुटवल उपमहानगरपालिका–११ का अध्यक्ष रामचन्द्र क्षेत्रीले फर्निचर व्यवसायलाई नयाँ पुस्तामा हस्तान्तरण गर्नुपर्ने आवश्यकता औंल्याए। अध्ययन गरेका युवालाई यस क्षेत्रमा आकर्षित गर्न सके चीनबाट आयात भइरहेका फर्निचरजन्य उत्पादनसमेत नेपालमै उत्पादन गर्न सकिने उनको दाबी थियो। व्यवसायीलाई अनुगमन र दर्ता प्रक्रियामा वडा कार्यालयले सधैँ सहयोग गर्ने उनले बताए।

रुपन्देही उद्योग संघका अध्यक्ष कृष्णप्रसाद पराजुलीले उद्योगलाई प्रविधिमैत्री बनाउनु अहिलेको आवश्यकता रहेको बताए। संघले मजदुरलाई सीपमूलक तालिम दिँदै आएको उल्लेख गर्दै फर्निचर व्यवसायीलाई पनि आवश्यकताअनुसार तालिम उपलब्ध गराउन तयार रहेको उनले बताए।

रुपन्देही व्यापार संघका वरिष्ठ उपाध्यक्ष दयानिधि भण्डारीले स्थानीय उत्पादनलाई ‘मेड इन रुपन्देही’ ब्रान्डका रूपमा स्थापित गर्न व्यवसायीलाई आग्रह गरे। स्थानीय उत्पादनको पहिचान र बजार विस्तारका लागि आफ्नो संस्था सहयोग गर्न तयार रहेको उनको भनाइ थियो।

उद्योग व्यापार संघ बुटवलका वरिष्ठ उपाध्यक्ष पदम जिसीले फर्निचर व्यवसायीका लागि छुट्टै औद्योगिक ग्राम निर्माण गर्न स्थानीय सरकारलाई सुझाव दिए।

संघका पूर्वअध्यक्ष तथा सल्लाहकार विष्णुकुमार श्रेष्ठले २३ वर्षपछि नाम परिवर्तन गरी जिल्लाभरका व्यवसायीलाई समेटेर संस्थालाई संस्थागत र विस्तार गरिएको बताए। पूर्वअध्यक्ष एवं लुम्बिनी प्रदेश समन्वय समिति संयोजक सुरेन्द्र ज्ञवालीले फर्निचर उद्योग संरक्षणका लागि झोले व्यवसायी नियन्त्रण गर्नु अहिलेको टड्कारो आवश्यकता रहेको बताए।

सल्लाहकार एवं बुटवल नगर खेलकुद विकास समितिका संयोजक बोनिन पियाले संस्थालाई बलियो बनाउँदै व्यवसायमा आधुनिक प्रविधि भित्र्याउन र गुणस्तरीय सामग्री उत्पादन गर्न व्यवसायीलाई सुझाव दिए। नेपाल पत्रकार महासंघ रुपन्देहीका उपाध्यक्ष विश्वास ढकालले संघले गर्ने अनुगमनका गतिविधि सञ्चारमाध्यममार्फत पनि सार्वजनिक गर्न आग्रह गरे।

सभामा महासचिव खिम खड्काले संघको वार्षिक प्रतिवेदन प्रस्तुत गरेका थिए। प्रतिवेदनअनुसार रुपन्देहीमा ९२३ फर्निचर उद्योग दर्ता भएका छन् भने संघमा २१५ उद्योगी मात्रै आबद्ध छन्। फर्निचर उद्योगले प्रत्यक्ष तथा अप्रत्यक्ष रूपमा करिब १५ हजार जनालाई रोजगारी दिएको प्रतिवेदनमा उल्लेख छ। दक्ष जनशक्ति विदेश पलायन हुनु, आयातित तयारी फर्निचरसँग प्रतिस्पर्धा गर्न कठिन हुनु र दर्ताबिनाका उद्योग सञ्चालन हुनु क्षेत्रका प्रमुख चुनौती रहेको प्रतिवेदनमा औंल्याइएको छ।

संघले बुटवल, देवदह, तिलोत्तमा र सैनामैनामा नगर उपसमिति गठन गरेको तथा दर्ताबिनाका उद्योगको पहिचान र व्यवस्थापनका लागि विभिन्न स्थानमा अनुगमन गरेको जनाएको छ। त्यस्तै, २० जना सदस्यलाई १६ दिने सीएनसी अपरेटर तालिम प्रदान गरिएको प्रतिवेदनमा उल्लेख छ।

संघका अध्यक्ष जिवकान्त काफ्लेको अध्यक्षता, वरिष्ठ उपाध्यक्ष नेत्र रुचालको स्वागत तथा उपाध्यक्ष अशोक कुँवरको धन्यवादमा सम्पन्न कार्यक्रमको सञ्चालन सचिव अनिरुद्र खनालले गरेका थिए।

पत्रकार आचार्य प्रदीप सम्मानित :

यसैबीच, फर्निचर उद्योग संघ रुपन्देहीले पत्रकारिता क्षेत्रबाट पुर्‍याएको योगदानको मूल्यांकन गर्दै पत्रकार प्रदीप आचार्यलाई नगदसहित सम्मान गरेको छ। साधारणसभाको अवसरमा संघले आचार्यलाई सम्मान गरेको हो। दैनिक लुम्बिनीका अनलाइन सम्योजक रहेका आचार्य प्राईम टेलिभिजन र नेपाल फोटो लाईब्रेरीमा पनि आवद्व छन।

सो अवसरमा कार्यालयमा लामो समय काम गरेका कार्यालय सचिव थर्कराज खनाललाइ समेत सम्मान गरिएको थियो ।

नागरिक अनलाइन

लेखकबाट थप

• आइतवार, कार्तिक १६ २०८३०८:५९:२५

• कविता : मकै पोल्ने दिदी

• रोट्रयाक्ट क्लब अफ बुटवल सिनर्जीको ९औँ पदस्थापन ,अध्यक्षमा कल्पित नेपाल

• फर्निचर व्यवसायका समस्या हलका लागि स्थानीय सरकार र सरोकारवाला संस्थाबीच सहकार्य जरूरी

• कांग्रेस क्षेत्र नं. २ रुपन्देहीद्वारा ‘माइन्युट लेखन तथा प्रभावकारी बैठक सञ्चालन’ तालिम

• गोवा र बुद्ध जन्मस्थल लुम्बिनीलाई एउटै पर्यटन सर्किटमा जोड्ने प्रस्ताव