सोमवार, आषाढ ७ २०७८

परिचयपत्रको दुरूपयोग रोक्न अनलाइन टीभी पत्रकार संघको अनुरोध

नागरिक अनलाइन

2.2K

परिचयपत्रको दुरूपयोग रोक्न अनलाइन टीभी पत्रकार संघको अनुरोध

बुटवल,असार ७-

पत्रकारका नाममा गैह्रपत्रकारहरुले पत्रकार परिचयपत्रको दुरुपयोग तत्काल रोक्न अनलाइन टीभी पत्रकार संघले माग गरेको छ । संघले प्रेस वक्तव्य जारी गर्दै पत्रकारका नाममा गैह्रपत्रकारहरुले पनि पत्रकार परिचयपत्रको प्रयोग गरेकोप्रति चिन्ता व्यक्त गरेको छ ।

संघका महासचिव पवन फुयालद्धारा जारी वक्तव्यमा पत्रकार सम्वन्धी विभिन्न संघ संस्था र संचार संस्थाहरुको परिचयपत्र कतिपय गैह्रपत्रकारहरुले पनि प्रयोग गर्ने गरेको गुनासो लामोसमयदेखि आइरहेको स्मरण गराइएको छ ।

विगतमा देखिएको समस्या समाधानका लागि ठोस पहल नभइरहेकै बेला संघको परिचयपत्र पनि कतिपय असंवन्धीत व्यक्तिहरुले प्रयोग गरेको भन्ने गुनासोहरु आएकाले त्यस बारेमा संघले आन्तरिक रुपमा छानविन गरिरहेको र त्यस्तो दुरुपयोग भएका परिचयपत्र नियन्त्रणमा लिने र रद्ध गराउने निर्णय गरेको संघले जनाएको छ ।

संघको आज बसेको कार्यसमितिको बैठकले पत्रकारको परिचयपत्र लिएर निषेधाज्ञाको बेलामा पनि हिडडुल गर्ने, पत्रकारले पाउने पहुँचको प्रयोगगर्नेलगायतका कृयाकलाप भइरहेकोप्रति सरोकारवालाहरुको ध्यानाकर्षण गराउने निर्णय गरेको वक्तव्यमा उल्लेख गरिएको छ ।

संघले लामो समयदेखि पत्रकार परिचयपत्रको दुरुपयोग भइरहेको आवाज उठिरहदाँ पनि यसको उचित सम्वोधन नभएकोमा संघलाई दुःख लागेको पनि जनाएको छ ।

पत्रकार परिचयपत्रको दुरुपयोग रोक्न सरोकारवालाहरुले ध्यान दिनुहुन, छानविनलाई कडाई गर्नुहुन, शंका लागेमा सोधीखोजी गर्नुहुन र दुरुपयोग भएको पाइएमा सम्वन्धीत निकायहरुमा खवर गरिदिनुहुन पनि संघले सवैलाई अनुरोध छ ।

साथै पत्रकार परिचयपत्र दुरुपयोग नियन्त्रण गर्ने सिलसिलामा प्रेस स्वतन्त्रतालाई असर पर्ने गतिविधि नगर्नुहुन पनि संघले सरोकारवाला सवैको ध्यानाकर्षण गराएको छ ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)