बुटवल ,असोज २५ ।

बुटवल उद्योग वाणिज्य संघ, रूपन्देहीको अध्यक्ष पदका उम्मेदवार टंकप्रसाद गैरे संघको वर्तमान वरिष्ठ उपाध्यक्ष हुन्।

संघमा करिब १८ वर्षदेखि आबद्ध रहँदै आएका गैरेले संस्थाभित्र विभिन्न जिम्मेवारी सम्हाल्दै नेतृत्वको अनुभव हासिल गरेका छन्। उद्योगी–व्यवसायीका बीचबाट नेतृत्वमा पुग्ने लक्ष्यसहित उनी २६औँ अधिवेशनमा अध्यक्ष पदका लागि प्रतिस्पर्धामा उत्रिएका छन्। संघभित्रको लामो अनुभव र नेतृत्वको यात्रामा लागेका गैरेको उम्मेदवारीको प्रमुख आधार संघभित्रको लामो संलग्नता र संस्थागत अनुभव हो।

उनी वर्तमान कार्यसमितिमा वरिष्ठ उपाध्यक्षको जिम्मेवारीमा रहँदै आएका छन्। संघको विभिन्न गतिविधि तथा व्यवसाय प्रवर्द्धनसम्बन्धी काममा उनको सहभागिता रहेको छ।

संघको कार्यसमिति बैठकबाट गठित अनुगमन तथा मूल्यांकन उपसमितिको संयोजकको जिम्मेवारीसमेत गैरेले सम्हालेका थिए। यसले उनलाई संस्थाको काम, कार्यसमिति सञ्चालन र व्यवसायीका सरोकारसँग नजिक रहेर काम गर्ने अवसर दिएको देखिन्छ।

व्यवसायीका समस्या र आर्थिक विकासको एजेन्डा :

गैरे नेतृत्वको समूहले ‘परिणाममुखी संयुक्त नेतृत्व, समृद्ध बुटवलको साझा प्रतिबद्धता’ भन्ने नारासहित चुनावी अभियान अघि बढाएको छ। समूहले सार्वजनिक गरेको १० बुँदे प्रतिबद्धतापत्रमा निम्न विषयलाई प्राथमिकता दिइएको छ।

उद्योगी–व्यवसायीको हकहित संरक्षण: व्यवसायीका समस्या समाधानका लागि प्रभावकारी पैरवी गर्ने।

लगानीमैत्री वातावरण: नयाँ उद्योग तथा उद्यमशीलतालाई प्रोत्साहन गर्ने।

व्यवसायमैत्री नीति: सरकार तथा सम्बन्धित निकायसँग समन्वय गरेर व्यावसायिक वातावरण सुधार गर्ने।

बजार विस्तार: स्थानीय उत्पादन, व्यापार र निर्यात प्रवर्द्धन गर्ने।

पूर्वाधार विकास: व्यवस्थित बजार, सडक, पार्किङ तथा औद्योगिक पूर्वाधारका विषयमा पहल गर्ने।

डिजिटल व्यवसाय: प्रविधिमैत्री सेवा र आधुनिक व्यावसायिक प्रणालीलाई प्रोत्साहन गर्ने।

युवा तथा महिला उद्यमशीलता: सीप, अवसर र लगानीमा पहुँच विस्तार गर्ने।

पर्यटन प्रवर्द्धन: बुटवलको आर्थिक तथा पर्यटकीय सम्भावनालाई अघि बढाउने।

पारदर्शिता र जवाफदेहिता: संघलाई संस्थागत, उत्तरदायी र परिणाममुखी बनाउने।

 संयुक्त नेतृत्व र सहकार्यको सन्देश

गैरेले आफ्नो समूहमा विभिन्न क्षेत्रका व्यवसायीलाई समेटेर सामूहिक नेतृत्वको अवधारणा अघि सारेका छन्। उनको प्यानलमा वरिष्ठ उपाध्यक्षका लागि विमलराज भट्टराई, उद्योग उपाध्यक्षमा दिनेश श्रेष्ठ, वाणिज्य उपाध्यक्षमा मुक्तिप्रसाद अधिकारी र महासचिवमा जमुना पौडेल उम्मेदवार छन्। अन्य पदमा पनि विभिन्न क्षेत्रका व्यवसायीलाई समेटिएको छ।

गैरेको समूहले व्यक्ति केन्द्रितभन्दा संस्थागत नेतृत्व, एकल निर्णयभन्दा सामूहिक सहभागिता र आश्वासनभन्दा परिणामलाई प्राथमिकता दिने प्रतिबद्धता जनाएको छ। व्यवसायीबीच सहकार्य बढाउँदै संघलाई उद्योगी–व्यवसायीका समस्या समाधान गर्ने प्रभावकारी साझा मञ्च बनाउने उसको लक्ष्य देखिन्छ।

अध्यक्ष पदको प्रतिस्पर्धा र चुनौती :

बुटवल उद्योग वाणिज्य संघको २६औँ अधिवेशनमा गैरेले नरिश्वर शर्मा पौडेलसँग अध्यक्ष पदमा प्रतिस्पर्धा गर्दैछन्। पौडेल पनि संघको पूर्व वाणिज्य उपाध्यक्ष तथा वर्तमान कार्यसमितिका सदस्य हुन्। दुवै उम्मेदवार संघको संस्थागत गतिविधिमा अनुभव हासिल गरेका व्यक्ति भएकाले निर्वाचनमा नेतृत्वको कार्यशैली, व्यवसायीका समस्या समाधान गर्ने क्षमता र प्रतिबद्धता कार्यान्वयनको विषय महत्त्वपूर्ण हुने देखिन्छ।

गैरेका लागि लामो समय संघमा रहेर हासिल गरेको अनुभवलाई परिणाममा बदल्नु, साना तथा मझौला व्यवसायीका समस्यालाई प्राथमिकतामा राख्नु र बदलिँदो बजारमा बुटवलको व्यावसायिक प्रतिस्पर्धात्मक क्षमता बढाउनु प्रमुख चुनौती हुनेछन्।

अनुभवलाई परिणाममा बदल्ने अवसर :

टंकप्रसाद गैरेको उम्मेदवारीलाई संघभित्रको निरन्तरता, संस्थागत अनुभव र सामूहिक नेतृत्वको प्रतिबद्धतासँग जोडेर हेर्न सकिन्छ। करिब दुई दशकको संस्थागत संलग्नताको दाबीका साथ अध्यक्ष पदमा अघि बढेका गैरेले सार्वजनिक गरेका एजेन्डाले व्यवसायीको हकहित, लगानी सुरक्षा, बजार विस्तार र बुटवलको आर्थिक विकासलाई केन्द्रमा राखेका छन्।

तर नेतृत्वको वास्तविक मूल्यांकन प्रतिबद्धता घोषणाले मात्र होइन, व्यवसायीका दैनिक समस्या समाधान, संघको पारदर्शिता, नीतिगत पैरवी र कार्यान्वयनबाट हुनेछ।

नागरिक अनलाइन

लेखकबाट थप

• सोमवार, आश्विन २६ २०८३१२:१५:०५

• कांग्रेसको १५औँ महाधिवेशन : उपसभापतिमा चन्द्रकान्त , मधु , बिनोद र महामन्त्रीमा प्रदीप र उदयशमशेर विजयी

• बरिष्ठ उपाध्यक्षका उम्मेदवार बिमलराज भट्टराई भन्छन् -‘व्यवसायको विकास, बुटवलको समृद्धि’

• टंकप्रसाद गैरे : अनुभवी, निरन्तरता र इमानदार व्यवसायीको छवि

• घटस्थापनाको दिन पारेर सिद्धबाबा मिष्ठान्न भण्डारको चौथो शाखा उदघाटन

•  बुटवल उवासंघको अधिवेशन : उद्योगी–व्यवसायीमाझ परिचित छन् सुरज !