बुटवल, माघ १० ।

नेपाली कांग्रेसले राष्ट्रपति पदमा उम्मेदवारी दिने निर्णय गरेको छ । कांग्रेसका केन्द्रीय पदाधिकारी र पूर्वपदाधिकारीको सोमबारको बैठकले राष्ट्रपति पदका लागि हुने निर्वाचनमा उम्मेदवारी दिने र आफ्नो उम्मेदवारको पक्षमा सहमति जुटाउन पहल गर्ने निर्णय गरेको हो ।

सभापति शेरबहादुर देउवाको धुम्बाराहीस्थित निवासमा बसेको बैठकले नेपाल कम्युनिस्ट पार्टी माओवादी केन्द्रबाट प्रधानमन्त्री र नेपाल कम्युनिस्ट पार्टी एमालेबाट सभामुख निर्वाचित भइसकेकाले राष्ट्रिय सहमति कायम गरी राष्ट्रपति पद कांग्रेसले लिनुपर्ने निर्णय गरेको हो । 

बैठकपछि सहमहामन्त्री किशोरसिंह राठौरले भन्नुभयो, “संविधान र लोकतन्त्रको रक्षार्थ नेपाली कांग्रेसका उम्मेदवारलाई राष्ट्रपतिमा निर्वाचित गर्न संसद्मा प्रतिनिधित्व गर्ने सबै राजनीतिक दलसँग छलफल गरेर सहमति कायम गर्ने निर्णय भएको छ ।”

उहाँले राजनीतिक जटिलतालाई पार लगाउन पार्टी एकढिक्का बनाएर जाने निर्णय भएको बताउनुभयो । साथै संसद्मा प्रमुख प्रतिपक्षी दलको दाबी गर्ने निर्णय पनि कांग्रेस पदाधिकारी बैठकले गरेको छ ।  

कांग्रेसका प्रवक्ता डा। प्रकाशशरण महतले राष्ट्रपतिको निर्वाचन समयमै हुनुपर्ने निष्कर्ष बैठकले निकालेको बताउनुभयो । उहाँले राष्ट्रपति चयनका लागि हुने निर्वाचन आगामी फागुन २९ गतेभन्दा पर सार्न नहुने बताउनुभयो । 

उहाँले भन्नुभयो, “राष्ट्रपतिको निर्वाचन कुनै पनि कारणले पछि सार्नुहुँदैन । समयमै सम्पन्न गर्नुपर्छ । कुनै कानुनी समस्या छन् भने ती कुरा समयमै समाधान गरेर प्रक्रिया अगाडि बढाउनुपर्छ भन्ने बैठकको निष्कर्ष छ ।”   

नागरिक अनलाइन

लेखकबाट थप

• मंगलवार, माघ १० २०७९०८:३४:५९

• Tags:

  # नेपाली कांग्रेस # राष्ट्रपति

• रक्तसञ्चार सेवाको ईतिहास झण्डै ४ सय बर्ष पुरानो

• दुई हजार ६८८ मिटर लामो नागढुङ्गा-सिस्नेखोला सुरुङमार्गको उद्घाटन

• ‘द बम्बई लाउञ्ज’को प्रथम वार्षिकोत्सव साउन १४ र १५ गते हुदै,छुटसहित सांगीतिक कार्यक्रम गरिने

• इन्जिनियरहरू पूर्वाधार निर्माणका मात्र होइन, समाज रूपान्तरणका महत्वपूर्ण साझेदार

• आजदेखि कार्तिक शुक्ल एकादशीका दिनसम्म तुलसीको विशेष पूजा