मंगलवार, कार्तिक १५ २०७९

कार्तिक १८ देखि २२ गतेसम्म हुने सत्यवती मेलाको तयारी पूरा,चिच्याएर वर माग्ने प्रचलन

नागरिक अनलाइन

1.7K

कार्तिक १८ देखि २२ गतेसम्म हुने सत्यवती मेलाको तयारी पूरा,चिच्याएर वर माग्ने प्रचलन

बुटवल,कार्तिक १५ ।

पाल्पाको सत्यवती मेलाको तयारी पूरा भएको छ । हरेक वर्षको कार्तिक पूर्णिमाका दिन लाग्ने धार्मिक मेला यस वर्ष कार्तिक १८ देखि २२सम्म लाग्दै छ । यहाँ चिच्याएर वर माग्ने चलन छ ।

तिनाउ गाउँपालिका–४ मा रहेको सत्यवती ताल र सत्यवती मन्दिरमा लाग्ने उक्त मेलाको तयारी बारे समितिले पत्रकार सम्मेलन गरी जानकारी गराएको छ । समितिले मन्दिर तथा ताल परिषरमै पत्रकार सम्मेलन गरी कार्तिक १८ देखि २२ गतेसम्म ४ दिन लाग्ने मेला र तयारी बारे जानकारी गराएको हो ।

सत्यवती देवीले कानले नसुन्ने भएकाले वर माग्दा चिच्याएर एउटा मात्र माग्नुपर्ने जनविश्वास छ । रातिको समयमा मन्दिरमा पूजा गर्नुअघि ताल परिक्रमा गर्दा चिच्याउँदै वर माग्ने चलन रहेको स्थानीयबासीको भनाई छ ।

मन्दिरमा भाकल गरेमा मनोकांक्षा पूरा हुने विश्वासले मानिसहरु भाकल चढाउन भारतबाट समेत आउने गर्दछन् । पाल्पा, गुल्मी, अर्घाखाँची, नवलपरासी, रुपन्देही तथा नेपालका सीमाक्षेत्र गोरखपुर, सुनौली, विहारलगायतका स्थानबाट समेत भक्तजन आउने गर्दछन् ।

धार्मिक मेलाको सुरक्षा व्यवस्थापनका लागि नेपाल प्रहरी, सशस्त्र प्रहरी तथा स्वयम् सेवकहरुको व्यवस्था गरिने भएको छ । विभिन्न सुरक्षा निकायहरुबाट ३ दर्जन बढी जनशक्तिको माग रिएको छ भने मन्दिर व्यवस्थापन समितिले थप एक दर्जन सुरक्षा स्वयम् सेवकको व्यवस्था गरिने सत्यवती ताल व्यवस्थापन समितिका अध्यक्ष दान बहादुर गाहाले जानकारी दिए ।

satyawati mandir.jpg