मंगलवार, श्रावण ३ २०७९

काठमाडौं महानगरले खरिद गरेका तीनवटा दमकल नेपाल आइपुगे

नागरिक अनलाइन

1.6K

काठमाडौं महानगरले खरिद गरेका तीनवटा दमकल नेपाल आइपुगे

काठमाडौं,साउन ३ ।

काठमाडौं महानगरपालिकाले अघिल्लो वर्ष नै खरिद सम्झौता गरेको तीनवटा दमकल नेपाल आइपुगेको छ ।

इन्डोनेसिया कम्पनीमा निर्मित तीनवटा दमकल आएको महानगरपालिका विपद् व्यवस्थापन विभागका प्रमुख रविनमान श्रेष्ठले जनकारी दिए ।

अघिल्लो वर्ष २०७८ साउन ३ गते मेयर विद्यासुन्दर शाक्यले महानगरको आफ्नै लगानीमा तीनवटा दमकल खरिद गर्न इन्डोनेशियन कम्पनीसँग सम्झौता गरेका थिए ।

३ हजार प्लस ५०० लिटर पम्प क्षमताको तीनवटा दमकल खरिदका लागि कम्पनीसँग ५ लाख ७५ हजार ९३३ अमेरिकी डलर (करिब ६ करोड ९१ लाख रुपैयाँ) मा सम्झौता भएको थियो । सोही सम्झौता बमोजिमको दमकल नेपाल आएको श्रेष्ठले जानकारी दिए । damkal ktm.jpg

हाल काठमाडौं महानगरपालिकामा विभिन्न देशहरुले अनुदानमा दिएका ६ वटा दमकल रहेका छन् । जसमध्ये तीनवटा काम गर्ने अवस्थामा र बाँकी ३ वटा काम गर्न नसक्ने भएपछि त्यसै थन्किएको महानगरको भनाइ छ ।

योसँगै महानगरपालिकाले यसै चालु आर्थिक वर्षमा समेत थप तीनवटा दमकल खरिद गर्ने गरी बजेट व्यवस्थापन गरेको महानगरपालिकाका प्रवक्ता नवीन मानन्धरले जानकारी दिए । प्रति गोटा ६५ लाख रुपैयाँ गरी तीन वटाका दमकलका लागि करिब २ करोड रुपैयाँ बजेट छुट्याइएको उनको भनाइ छ ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)