बिहिवार, पौष १ २०७८

जाडोमा न्यानो पोशाक पाएपछि पाल्पा तिनाउ-३ का ८६३ बिद्यार्थी दङ्ग !

नागरिक अनलाइन

2.7K

जाडोमा न्यानो पोशाक पाएपछि पाल्पा तिनाउ-३ का ८६३ बिद्यार्थी दङ्ग !

बुटवल,पुस १ ।

पाल्पाको तिनाउ गाउँपालिका वडा नम्बर ३ का आधा दर्जन विद्यालयमा अध्ययनरत बिद्यार्थीहरू न्यानो पोशाक पाउंदा खुसी भएका छन् । वडा नम्बर ३ को वार्षिक बजेट तथा कार्यक्रम अन्तरगत यहाँ ६ वटा विद्यालयका ८६३ बालबालिकाहरुले न्यानो कपडा पाएका हुन् ।

वडा अन्तरगत रहेका तिलोत्तमा मावि झुम्साका ५ सय विद्यार्थी, आदर्श आधारभूत विद्यालय ज्यामिरेका १३२ जना, गौतमबुद्ध आधारभूत विद्यालय चुरेडाँडाका ५५ जना, सरस्वती आधारभूत विद्यालय मरेकका २५ जना तथा श्रीजना आधारमूत विद्यालयका १३९ जना बालबालिकालाई न्यानो कपडा वितरण गरिएको तिनाउ–३ का अध्यक्ष प्रेम पाण्डेले जानकारी दिए ।

विद्यालयहरुमा न्यानो कपडा वितरणको कार्यक्रम अन्तरगत तिनाउ–३ श्री डंँडामा अवस्थित श्रीजना आधारभूत विद्यालयका विद्यार्थीहरुलाई विहिबार न्यानो कपडा वितरण गर्दै अध्यक्ष पाण्डेले वडाको विकासमा प्रहिलो प्राथमिकता शिक्षालाई दिइएको दाबी गरे । भौतिक संरचना तथा पूर्वाधार विकासले मात्रै समृद्धि हासिल गर्न नसकिने बताउँदै उनले शिक्षाका आधाभूत प्राथमिकताहरुलाई अनिवार्य पूरा गर्ने गरी अघि बढिएको उल्लेख गरे ।

गाउँपालिकामै पहिलो झुम्साको तिलोत्तमा माविमा प्राविधिक शिक्षा सञ्चालन गर्न सफल भएको उल्लेख गर्दै नले सबैको हातेमालोमा अन्य विकासका कामहरु पनि सफल पार्नु पर्ने उनले बताए । न्यानो कपडा वितरण अभियानको समापनका अवसरमा आयोजित सभामा बोल्दै सृजना माविका व्यवस्थापन समितिका अध्यक्ष गोकर्ण दर्लामीले शैक्षिक विकासका लागि भौतिक पूर्वाधारका साथै प्रयाप्त शिक्षक दरबन्दी नहुँदा समस्या भएको गुनासो गरे ।

विद्यालयको आन्तरिक श्रोत तथा अनुदानका आधारमा शिक्षक कर्मचारी पाल्नु पर्ने अवस्था रहेको गुनासो गर्दै उनले यसका लागि गाउँपालिका, प्रदेश सरकार तथा केन्द्र सरकारले ध्यान दिन आग्रह गरे ।

तिनाउ ३ का वडा सदस्य पम्फा थापा, गँगाबहादुर पुन, हेमबाहादुर दर्लामी, हुमादेवि सुनार, समाजसेवी तथा कांग्रेस पाल्पा जिल्ला सदस्य विष्णु पाण्डे तथा श्रीजना आधारभूत विद्यालयका प्रधानाध्यापक भिमप्रसाद उपाध्यायले शैक्षिक बिकासका लागि भौतिक संरचना तथा पूर्वाधार विकासमा जोड दिए ।