बुटवल,मंसिर २३  ।

नेपाल शैक्षिक परामर्श संघ (इक्यान) रुपन्देहीको अध्यक्षमा गोविन्द बस्नेत निर्वाचित भएका छन् । इक्यानको आइतबार बुटवलमा सम्पन्न सातौं वार्षिक साधारणसभा तथा चौथो अधिवेशनबाट बस्नेत आगामी २ वर्षे कार्यकालका लागि अध्यक्ष निर्वाचित भएका हुन् ।

अध्यक्ष पदमा दुई जनाको दाबी भएपछि मतदान प्रक्रियाबाट नेतृत्वको टुङ्गो लागेको हो । अर्का अध्यक्षका प्रत्यासी राजेश प्रसाद पाण्डे १ मतले पराजित भएका हुन् । कूल खसेको ३७ मतमा अध्यक्ष निर्वाचित बस्नेतले १९ मत प्राप्त गरेका थिए भने पाण्डेले १८ मत प्राप्त गरेका थिए । अन्य पदाधिकारी तथा सदस्यहरुमा भने सर्वसहमत भएको थियो ।

जस अन्तरगत उपाध्यक्षमा दिपेश अर्याल,  सचिबमा उपेन्द्र यादव, कोषाध्यक्षमा रामचन्द्र खरेल चयन भएका छन् । यसैगरी सदस्यहरुमा किरण राना, राम प्रसाद खड्का, शिव पौडेल र शिखर गिरि धिताल चयन भएका छन् ।

यसअघि आयोजित उद्घाटनसत्रमा बोल्दै इक्यानका केन्द्रीय अध्यक्ष शेषराज भट्टराईले जेनजी आन्दोलनपछि शैक्षिक परामर्श केन्द्रहरुको भूमिका थप बढेको बताउँदै गम्भीर भएर लाग्नु पर्नेमा जोडदिएका थिए । युवाहरुलाई अध्ययनका लागि विदेश पठाउने मात्र नभई उनीहरुलाई स्वदेश फर्केर केही गर्न सकिन्छ भन्ने आशा जगाउन पनि आवश्यक रहेको बताए । यसैगरी इक्यान केन्द्रीय महासचिव दिपकराज भुसालले इक्यानको पक्षमा नीतिगत सुधारका लागि राज्यलाई आवश्यक दबाब सिर्जना गर्नुपर्नेमा जोड दिए ।

कार्यक्रममा इक्यानका विभिन्न केन्द्रीय पदाधिकारीहरु, वसभिन्न जिल्लाका प्रतिनिधि तथा सल्लाहकारहरुले बोल्दै संस्थालाई सधै चलायमान बनाएर सदस्यहरुको पेशागत हितमा काम गर्न सुझाब दिएका थिए । इक्यान रुपन्देहीका संस्थापक अध्यक्ष देव कुंवरले स्थापना कालदेखि वर्तमान अवस्थासम्म आइपुग्दा प्राप्त अनुभवहरु बारे चर्चा गर्दै थप संगठित भएर अघि बढ्न जोड दिए ।

इक्यान रुपन्देहीका वर्तमान अध्यक्ष गिरीराज पाण्डेले आफ्नो कार्यकाललाई सफल बनाउन सहयोग गर्ने पदाधिकारी, कार्यसमिति सदस्य, सल्लाहकार तथा सदस्यहरुलाई धन्यवाद ज्ञापन गरेका थिए । कार्यक्रममा विभसन्न व्यक्ति तथा सञ्चारकर्मीहरुलाई सम्मान गरिएको थियो । 

नागरिक अनलाइन

लेखकबाट थप

• मंगलवार, मंसिर २३ २०८२०३:५२:१२

• Tags:

  # इक्यान रुपन्देही

• बुटवल उद्योग वाणिज्य संघले ‘दीपावली सडक खाना महोत्सव’ गर्ने

• नेपाल प्रेस युनियन रुपन्देहीद्वारा शुभकामना आदान–प्रदान

• बुटवलमा टीभीएसको ‘अचम्मैको महा एक्सचेन्ज’ मेला सुरु हुँदै

• बुटवल उद्योग बाणिज्य संघ : नवनिर्वाचित नेतृत्वद्वारा शपथसहित पदभार ग्रहण

• रास्वपा सरकारको नियत नै ठिक छैन : एमाले महासचिव शंकर पोखरेल