मंगलवार, आश्विन २१ २०८२

ओली र लेखकविरुद्धको जाहेरी लिएर प्रहरीले पठायो आयोग

नागरिक अनलाइन

879

ओली र लेखकविरुद्धको जाहेरी लिएर प्रहरीले पठायो आयोग

काठमाडौँ,असोज २१ ।

नेकपा एमालेका अध्यक्ष तथा तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई पक्राउको माग गर्दै लगिएको जाहेरी काठमाडौं प्रहरीले लिएर आयोगमा पठाएको छ।

जेनजी आन्दोलनका घाइतेका परिवारले प्रहरी परिसर काठमाडौँले सरकारले गठन गरेको गौरीबहादुर कार्की नेतृत्वको आयोगमा पठाएकोे जनाएको छ।

‘जाहेरी बुझेर हामीले गौरीबहादुर कार्की नेतृत्वमा रहेको आयोगमा पठाइएको छ,’ परिसरका एसपी पवन भट्टराईले भने, ‘यो हाम्रो क्षेत्रको कुरा भएन। यसबारे कार्यक्षेत्र भएको आयोगमा पठाएका छौँ।’

भदौ २३ र २४ गते जेनजीको आन्दोलन हुँदा प्रधानमन्त्री रहेका ओली र गृहमन्त्री रहेका लेखकलाई पक्राउ गर्न जेन्जीहरुले सामाजिक सञ्जालमा ट्रेन्ड पनि चलाएका छन्।

हामी नेपालीका संयोजक सुदन गुरुङसहित जेनजीका प्रतिनिधिले यसअघि सरकारलाई ओली र लेखकलाई तत्काल पक्राउ गर्न भन्दै ध्यानाकर्षण गराएका थिए।

त्यस्तै काठमाडौँ महानगरपालिकाका प्रमुख बालेन्द्र शाहले पनि बालुवाटार पुुगेर प्रधानमन्त्रीलाई यसबारे दबाब दिएका थिए।

जेनजी र बालेन्द्र शाहको दबाबपछि गएराति सरकारले सुरक्षा प्रमुखहरुसँग यसबारे छलफल गरेको थियो।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)