सोमवार, माघ १ २०८०

न्यू होराइजन प्रदेशस्तरीय हाजिरीजवाफ प्रतियोगिताको ३० औं संस्करण सुरू

नागरिक अनलाइन

1.7K

न्यू होराइजन प्रदेशस्तरीय हाजिरीजवाफ प्रतियोगिताको ३० औं संस्करण सुरू

बुटवल,माघ १ ।

न्यू होराइजन इङ्लिस बोर्डिङ स्कूलको आयोजनामा लुम्बिनी प्रदेशस्तरीय हाजिरीजवाफ प्रतियोगिताको ३० औं संस्करण सुरू भएको छ । प्रतियोगिताको ३० औं संस्करणको प्रथम चरण आज आइतबार तीन वटा केन्द्र रुपन्देहीको बुटवल, दाङको लमही र पाल्पामा एकै साथ सुरु भएको हो ।

रूपन्देहीको बुटवल केन्द्रमा ४१ विद्यालय प्रतियोगितामा सहभागी भएका थिए भने हिट राउन्डबाट ६ टिम प्रतिस्पर्धामा उत्रेका थिए । हाजिरीजवाफ प्रतियोगिता शुभारम्भपछि बोल्दै प्रमुख अतिथि लुम्बिनी प्रदेशसभा सदस्य तथा पुर्व स्वास्थ्यमन्त्री भोजप्रसाद श्रेष्ठले भविष्य उज्ववल बनाउन नैतिकता र अनुशासन नै प्रमुख आभार हुने धारणा राखे ।

बुद्धीविवेकलाई सहि ढंगले प्रयोग गरेमा मात्र नया काम गर्न सकिने र असल नागरिक बन्न सकिने उनको भनाइ छ । देशमा सहि शिक्षा नीतिको अभाव रहेको उनको तर्क छ । शिक्षालाई उद्यमसंग जोडेर अघि बढ्नुपर्ने काममा राजनीतिक दलहरू अग्रसर हुनुपर्ने श्रेष्ठको भनाइ छ ।विद्यार्थीको प्रतिभा उजागर गर्नका लागि यसप्रकारको प्रतियोगितालाई निरन्तरता दिएको माविका प्राचार्य लोकनाथ उपाध्यायले बताए ।

विद्यालयका शिक्षक कपिल आचार्यको संचालनमा भएको उद्घाटन कार्यक्रममा अभिभावक संघमा केन्द्रीय सदस्य लोकनाथ ज्ञवालीले विद्यार्थीको सिकाई नै सबैभन्दा ठुलो उपलब्धि हुने बताए । कार्यक्रम संयोजक कमलापति अर्याल, राजिव श्रेष्ठ, भास्करनाथ पाण्डे लगायतले बोलेका थिए ।

त्यसैगरी आजै दाङ केन्द्र २१ विद्यालय र पाल्पा केन्द्र २७ विद्यालय प्रतियोगितामा सहभागी भएका छन । बुटवल, दाङ र पाल्पा केन्द्रबाट उत्कृष्ट भएका ६ टिमबिचमा माघ २६ गते बुटवलमा फाईनल प्रतिस्पर्धा हुने संयोजक कमलापति अर्यालले बताए ।

फाइनल राउन्डमा प्रत्येक केन्द्रबाट सेमीफाइनलमा प्रथम र द्वितीय भएका ६ विद्यालय प्रवेश पाउने छन् । फाइनलमा प्रथम हुनेलाई ३३ हजार, द्वितीय हुनेलाई २४ हजार, तृतीय हुनेलाई १८ हजार तथा सिल्ड, ट्रफी र प्रमाण पत्र प्रदान गरिने संयोजक अर्यालले बताए ।

फाइनलमा ३ वटै प्रतियोगी समूहलाई प्रोत्साहन पुरस्कार प्रति समूह ३ हजारका दरले नगद र प्रमाणपत्र दिइने छ । त्यस्तै तीन वटै केन्द्रमा प्रथम हुनेलाई ९ हजार, द्धितीय ६ हजार, तृतीयलाई ४ हजार ५ सय र प्रोत्साहन पुरस्कार अन्य ३ समुहलाई प्रति समुह १५०० को दरले ४५०० शिल्ड मेडल र प्रमाणपत्रको समेत व्यवस्था गरिएको छ । लमही केन्द्रमा हुने प्रतियोगिताका लागि शिक्षक प्रकाश खनाल, पाल्पा केन्द्रमा विष्णुप्रसाद बस्याल र बुटवल केन्द्रमा मुक्तिनाथ पौडेललाई संयोजक अर्यालले बताए ।