शुक्रवार, आषाढ ३ २०७९

खेलराजको वाचा- ‘म बुटवल नगर प्रमुखको रूपमा उभिँदासम्म तपाईहरूको शीर झुक्न दिने छैन’

नागरिक अनलाइन

3.7K

खेलराजको वाचा- ‘म बुटवल नगर प्रमुखको रूपमा उभिँदासम्म तपाईहरूको शीर झुक्न दिने छैन’

बुटवल,असार ३ ।

बुटवल उपमहानगरपालिकाका प्रमुख खेलराज पाण्डेयले नगरलाई साझा रूपमा अघि बढाउने बताएका छन् ।

नेपाली कांग्रेस निर्वाचन परिचालन समिति बुटवलले गरेको सम्मान तथा धन्यवाद ज्ञापन कार्यक्रममा बोल्दै प्रमुख पाण्डेले कांग्रेसको सल्लाह र मार्गदर्शनमा सबै दलहरूलाई साथमा लिएर अघि बढ्ने बताए ।

‘म नेपाली कांग्रेसको मार्गदर्शनअनुसार गठबन्धनका दलहरू र प्रतिस्पर्धी दलहरूलाई सँगै लिएर हिडेमा मात्रै बुटवल समृद्ध बन्छ, उनले भने-जनताको सिपाही भएर काम गर्छु, म पार्टीको पनि सिपाही हो, म विधिभन्दा बाहिर जान्न, यसमा पार्टीले साथ र सहयोग गर्नुपर्छ, म सबैलाई साथ लिएर हिड्छु ।’

उनले बुटवलका मुख्य समस्या समाधानका लागि वडास्तरबाट नै समाधानका लागि साथ र सहयोग गर्न आग्रह गरे ।

‘म बुटवल नगरको प्रमुखको रूपमा उभिदा तपाईहरूको शीर झुक्न दिने छैन, उनले भने( मलाई चुनाब जिताउन दिनरात नभनेर खटिनेहरूको भावनालाई साथ लिएर हिड्नेछु, बुटवलको खानेपानी, सुकुम्बासी र अव्यवस्थित बसोबासी, मोतीपुर औद्योगिक क्षेत्र, ज्योतिनगर पहिरो, सडक, तिनाउ नदीको कटान जस्ता क्षेत्रमा काम गर्नुपर्ने छन्, यी सबैलाई क्रमैसँग अघि बढाउनेछु ।’

बुटवललाई आर्थिक केन्द्रको रूपमा स्थापित गर्नका लागि प्रदेश र संघको साथ र सहयोग लिएर अघि बढ्ने उनले बताए ।

कार्यक्रममा नेपाली कांग्रेस लुम्बिनी प्रदेश कोषाध्यक्ष प्रकाश रानाले बुटवललाई समृद्ध बनाउनका लागि पार्टीको साथ र सहयोग लिएर अघि बढ्न आग्रह गरे । ‘बुटवललाई समृद्ध बनाउन विजयी भएर नगरमा पुग्नुभएका प्रमुख, वडाध्यक्ष, सदस्यहरूलाई म मेरो स्थानबाट पर्याप्त सहयोग गर्नेछु’-उनले भने ।

निर्वाचन परिचालन समितिका संयोजक रामबहादुर कार्कीको अध्यक्षतामा भएको बधाई तथा धन्यवाद ज्ञापन कार्यक्रममा कांग्रेस नेताहरू युवराज गिरी, प्रजापाल गिरी, परशुराम ढकाल, ज्योति भण्डारी, विमलराज भट्टराई, काजीमान श्रेष्ठ, बोनिन पिया, जमुना ढकाललगायतले बोलेका थिए ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)