बुटवल, माघ २४।

आगामी फागुन २१ गते हुने प्रतिनिधि सभा निर्वाचनलाई लक्षित गर्दै नेपाली कम्युनिष्ट पार्टी (नेकपा) रुपन्देहीले क्षेत्र नं २ मा कृण्णबहादुर थापाको संयोजकत्वमा ३ सय १ सदस्यीय युवा परिचालन समिति गठन गरेको छ ।

शनिवार बुटवलमा सम्पन्न भेलाले समितिको सह–संयोजकहरुमा प्रकाश परियार, सिर्जन थापा, धनसिंह खाम्चा र गोबिन्द खरेललाई चयन गरेको छ ।  

रुपन्देहीको बुटवल उपमहानगरपालिकाका १३ वडा, कतिलोत्तमाका ६ वडा र सैनामैनाका ४ वडामा नेतृत्वमा रहेका युवाहरुलाई परिचालन समितिमा राखिएको नेकपाले जनाएको छ ।
निर्वाचनको मिति नजिकिदै जाँदा निर्वाचन बिथोल्ने गतिविधि र आम मतदातालाई अनेक प्रलोभन देखाएर प्रभावित पार्ने अवस्थालाई न्यून गर्न युवाहरुले भूमिका खेल्ने संयोजक कृण्ण थापाले बताए ।
उनका अनुसार युवा परिचालन समितिले आफ्ना उम्मेदवारलाई विजयी बनाउन मतदाता शिक्षा र चुनाव चिन्हका बारेमा समेत जनतालाई जागरुक बनाउन  भूमिका खेल्ने छ ।
युवा परिचालन समिति भेलामा बोल्दै नेकपा रुपन्देही क्षेत्र नं २ का नेकपाका उम्मेदवार तथा युवा नेता सुवास पाण्डे ‘विश्वदीप’ले चुनाव जितेपछि नीतिगत कामका लागि संसदमा आवाज उठाउदै युवाहरुलाई स्वरोजगार बनाउन आफूले महत्वपूर्ण पहलकदमी लिने प्रतिवद्धता व्यक्त गरे ।
उम्मेदवार पाण्डेले रुपन्देहीको विकासका साथै समग्र लुम्बिनी प्रदेशको विकासमा आफूले नेतृत्व गर्न चाहेको उल्लेख गर्दै पार्टीका शिर्षथ नेताहरुसंगको सहकार्यबाट प्राप्त अनुभवलाई जनताको हितमा प्रयोग गरिने बताए ।
युवाहरुले उठाएका विभिन्न जिज्ञासाहरुको जवाफ दिदै उनले आफू विजयी पछि जेन्जी आन्दोलनको मर्म र भावना अनुसार कुनै राजनीतिक पूर्वाग्रहबिना जनताको सेवामा हरदम खटिने प्रतिवद्धता व्यक्त गरे ।
युवा नेता पाण्डेले आफू सधै जनताको सुख र दुःखको साथि बन्न चाहेको उल्लेख गर्दै आगामी दिनमा जस्तोसुकै कठिन अवस्थामा पनि जनताको साथमा रहने जिकिर गरे ।
कार्यक्रममा बोल्दै नेकपाका केन्द्रीय सदस्य एवं रुपन्देही क्षेत्र नं २ निर्वाचन परिचालन समितिका संयोजक नारायण जी.सी. ‘निर्मल’ले आफ्नो पार्टीको उम्मेदवार विचारमा प्रतिवद्ध, भ्रष्टचारमा कुनै दाग नलागेको निष्कलंक रहेको र विकासको स्पष्ट खाका लिएर चुनावमा होमिएकाले तारा चिन्हमा मतदान गरेर विजयी बनाउन आम मतदातालाई आग्रह गरे ।  
नयाँ भनिने दलहरुले जेन्जी आन्दोलनले उठाएका मागहरु जायज छन भन्न नसकेको उल्लेख गर्दै उनले जेन्जी आन्दोलनको हुर्मत लिनेहरुलाई बेलैमा चिनेर जनताले मतदानबाट जवाफ दिनुपर्ने बताए ।
युवा परिचालन समितिका संयोजक कृण्णबहादुर थापाको अध्यक्षतामा सम्पन्न भेलामा नेकपाका नेता एवं निर्देशक समितिका संयोजक राम परियार, प्रकाश परियार लगायतले आ–आफ्नो धारणा राखेका थिए ।

नागरिक अनलाइन

लेखकबाट थप

• शनिवार, माघ २४ २०८२०८:२२:५७

• Tags:

  # नेकपा

• रक्तसञ्चार सेवाको ईतिहास झण्डै ४ सय बर्ष पुरानो

• दुई हजार ६८८ मिटर लामो नागढुङ्गा-सिस्नेखोला सुरुङमार्गको उद्घाटन

• ‘द बम्बई लाउञ्ज’को प्रथम वार्षिकोत्सव साउन १४ र १५ गते हुदै,छुटसहित सांगीतिक कार्यक्रम गरिने

• इन्जिनियरहरू पूर्वाधार निर्माणका मात्र होइन, समाज रूपान्तरणका महत्वपूर्ण साझेदार

• आजदेखि कार्तिक शुक्ल एकादशीका दिनसम्म तुलसीको विशेष पूजा