शनिवार, भाद्र १२ २०७८

एमाले रूपन्देहीको समानान्तर कमिटी नेकपा (एकिकृत समाजवादी) मा रूपान्तरित

नागरिक अनलाइन

3.8K

एमाले रूपन्देहीको समानान्तर कमिटी नेकपा (एकिकृत समाजवादी) मा रूपान्तरित

बुटवल,भदौ १२ ।

एमालेको समानान्तर कमिटी सञ्चालन गर्दै आएको नेपाल पक्षको रूपन्देही जिल्ला कमिटीले सर्वसम्मतरुपमा माधव नेपाल नेतृत्वको नेकपा (एकिकृत समाजवादी) मा रूपान्तरित हुने निर्णय गरेको छ।

रूपन्देहीको बुटवलमा सम्पन्न समानान्तर कमिटीको बैठकले सिङ्गो कमिटी नेकपा ९एकिकृत समाजवादी० मा रूपान्तरित हुने निर्णय गरेको हो।

समानान्तर कमिटीका अध्यक्ष राजु गुरूङको अध्यक्षतामा बसेको बैठकमा सहभागी सदस्यले केपी ओली नेतृत्वको एमालेले देश, जनता र कम्युनिष्ट आन्दोलनलाई धोका दिएका कारण एमालेबाट बिद्रोहको विकल्प नरहेको निष्कर्ष निकालेका छन्।

सहभागी सदस्यहरुले कम्युनिष्ट आन्दोलनको रक्षा गर्न र राष्ट्रियता जोगाउन सर्वसम्मतरुपमा एकिकृत समाजवादी पार्टीमा रुपान्तरित हुने बैठकले निर्णय गरेको साविक एमाले रुपन्देही जिल्ला कमिटीका अध्यक्ष राजु गुरुङले जानकारी दिए।

बैठकमा साविक एमाले उपाध्यक्ष पुरुषोत्तम घिमिरे, सिद्धार्थनगर नगरपालिकाकी उप मेयर उमा काफ्लेलगायतले क्रान्तिकारी रुपान्तरणका लागि एकीकृत समाजवादीमा समाहित हुनुको विकल्प नभएको बताएका थिए।

सिद्धार्थ नगरपालिकाका नगर प्रमुख हरि अधिकारी र तिलोत्तमा नगरपालिकाकी उपमेयर जागेश्वरी चौधरीले कार्यव्यस्तताका कारण उपस्थित हुन नसके पनि आफूहरुको समर्थन नेकपा एकिकत समाजवादीमा रहेको सन्देश उपलब्ध भएको अध्यक्ष गुरुङले दाबी गरे।

एमाले पार्टी विभाजनमा रुपन्देहीका अधिकांश वडा अध्यक्षहरु एकीकृत समाजवादीमा आउने तयार रहेको अध्यक्ष गुरूङले बताए ।

नेकपा एमालेको विभाजनमा सन्दर्भमा छलफल गरि प्राप्त भएका सुुझावका आधारमा सर्वसम्मतले पुर्नगठित पार्टीमा समाहित हुने निर्णयमा गरिएको उपसचिव सिद्धिचरण भट्टराईले बताए ।

बैठकलाई नेताहरु नन्दिकेशर ढकाल, पार्टी एकता राष्ट्रिय अभियानका सचिव भोज वहादुर खडका, राम बहादुर चौहान, पुरूषोत्तम घिमिरेले सम्बोधन गर्दै ओलीकै कारण पार्टी विभाजन भएको बताए ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)